पोखरा । गण्डकी प्रदेश सरकारको निमन्त्रणा तथा नीजिक्षेत्रको अग्रसरतामा ११ देशका राजदुतहरु पोखरा भ्रमणका लागि पुगेका छन् । ४२ औं विश्व पर्यटन दिवसको अवसर पारेर राजदूतहरुलाई पोखरामा निमन्त्रणा दिइएको थियो ।
पोखरा पुगेका कुटनीति नियोगका प्रमुख तथा प्रतिनिधिहरु, अन्तराष्ट्रिय विकास साझेदार संस्थाका प्रमुख तथा प्रतिनिधिहरूले अन्तर्राष्ट्रिय पर्वतीय संग्रहालय समेत अवलोकन गरेका छन् ।
तीन दिने भ्रमणका क्रममा नेपालका लागि संयुक्त राज्य इमिरेट्स, कतार, फिनल्याण्ड, दक्षिण कोरिया, साउदी अरेबिया, श्रीलंका, थाइलेण्ड, बंगलादेश, ईजिप्ट, जर्मनी, मलेशियाका महामहिम राजदुतहरु पोखरा पुगेका छन् । त्यसैगरि सार्कका महासचिब, यूयनका आबासीय संयोजक, इसिमोडका निर्देशक, आईओएमका मिसन प्रमुख, यूयनएडका नेपाल निर्देशक, यूयनडिपीका आबासीय प्रतिनिधि, युनेस्कोका प्रतिनिधी र डब्लुएफपिका प्रतिनिधिहरुको समेत सहभागिता रहेका छन् ।
भ्रमणमा परराष्ट्र मामिला मन्त्रालयका शिष्टाचार महापाल डा. दुर्गा बहादुर सुबेदी तथा उपप्रमुख रेवती रमण पौडेल समेत छन् ।
गण्डकी प्रदेशका पर्यटकीय गन्तब्यहरु सुरक्षित, पर्यटकका लागि खुल्ला रहेको सन्देश दिन विशिष्ट पाहुनालाई गण्डकी प्रदेश सरकारले निमन्त्रणा दिइएको थियो ।
राजदुतहरूले हिमाली क्षेत्रका सम्पदाहरुको खुलेर प्रशंसा गरेका थिए । उनीहरुले पदयात्रा तथा पर्वतारोहण सम्बन्धी जिज्ञासा राख्नुका साथै बिभिन्न हिमालका आधार शिबिरसम्म पुग्ने बाटो र समयका बारेका सोधेका थिए ।
नेपाल पर्वतारोहण संघ गण्डकी प्रदेशका सचिब सुदिप गौतम, कार्यकारी समितिका सदस्यद्धय मनशान्त घिमिरे तथा दिपेश बाबु सुबेदी, सदस्य छिरिङ लामा शेर्पा र संग्रहालयका गाइड तथा कर्मचारीहरुले भ्रमणलाई सहजिकरण गरेका थिए ।
संग्रहालयकी कार्यकारी निर्देशक निर्मला न्यौपानेले बिशिष्ट पाहुनाहरुलाई एक कार्यक्रमकाबीच संघद्धारा जारी गरिएको पिक प्रोफाईल, अन्तराष्ट्रिय पर्वतीय संग्रहालयको प्रोफाईल र मायाको चिनो हस्तान्तरण गरेकी थिइन् ।
