५ श्रावण २०८१, शनिबार | Sat Jul 20 2024

ब्रोम्दिङ एक्सप्लोरः ‘ब्रोम्दिङ घुम्न निम्तो’



नयाँ पर्यटकीय गन्तव्य ‘ब्रोम्दिङ’ को राष्ट्रिय तथा अन्तराष्ट्रिय रुपमा प्रवद्र्धन गर्ने उदेश्यले आयोजना गरिएको ब्रोम्दिङ पर्यटन महोत्सवले ब्रोम्दिङ घुम्नका लागि निम्तो गरेको छ ।

धादिङको बेनीघाट रोराङ गाउँपालिका १ मा रहेको ब्रोम्दिङ डाँडा(थुम्काहरु) को प्रचारप्रसार गर्ने उदेश्यले कार्तिक १५ र १६ गते ‘पर्यटन महोत्सव’ गरिएको थियो ।

बागमती प्रदेश सरकारका मुख्यमन्त्री शालिकराम जमरकट्टेलले महोत्सवको उद्घाटन गर्दै यहाँको विकास, प्रवद्र्धनका लागि सदैव तत्पर रहेको बताए ।

यहाँको सडक निर्माणको लागि बजेट व्यवस्था गरेसँगै निर्माण प्रक्रिया अघि बढेको मुख्यमन्त्रीको भनाई थियो ।
‘नेपालकै प्रसिद्ध ठाउँ हो, ब्रोम्दिङ । यहाँबाट हिमश्रृंखला देख्नुको साथै सन्दुर प्राकृतिक डाँडाकाँडा देख्न सकिन्छ,’ मुख्यमन्त्री जमरकट्टेलले भने,‘अबको दुई वर्षमा यहाँको सडक सम्पन्न हुन्छ । यहाँहरु सबैलाई स्वागत गर्न चाहान्छु । सबैलाई निम्तो छ ।’

आर्थिक मामिला तथा योजना मन्त्री बहादुर सिं तामाङले यहाँको विकासका लागि मुख्यमन्त्रीसँग सल्लाह गरेर बजेट व्यवस्था गर्ने प्रतिबद्धता गरेका थिए ।

बेनीघाट रोराङ गाउँपालिका र एनटीपी मल्टिमिडिया ग्रुपको संयुक्त आयोजनामा महोत्सव भएको हो । २०८० मिटर उचाईमा रहेको ब्रोम्दिङ आफैमा प्राकृतिक सुन्दरताले भरिएको डाँडा हो । जहाँबाट गणेश हिमाल, मनास्लु लगायतका हिमश्रृङ्खला हेर्न सकिन्छ ।
तामाङ बस्तीको बाहुल्यता र चेपाङ बस्ती समेत रहेको ब्रोम्दिङ आफैमा प्राकृतिक सुन्दर ठाउँ हो ।

राजधानी काठमाडौँबाट करिव चार घण्टाको मोटर यात्रामै पुग्न सकिन्छ । नागढुंगा–मुग्लिन सडकखण्डको विशालटारबाट २३ किलोमिटर उकालो लागेपछि पुगिने ब्रोम्दिङ र थमभञ्ज्याङ स्थानीय रुपमा उत्कृष्ट पर्यटकीय गन्तव्य मानिन्छ ।

ब्रोम्दिङ डाँडाबाट हेटौंडा, रक्सौल, धादिङका विभिन्न ठाउँ देखिन्छन् । आँखैअगाडि सेतै हिमाल प्रष्टसँग देखिने ब्रोम्दिङ मकवानपुर, धादिङ र चितवनको सीमा पनि हो । मकवानपुरको कैलाश गाउँपालिका, धादिङको गजुरी र बेनीघाट रोराङ गाउँपालिकाको केन्द्रका रुपमा ब्रोम्दिङ गाउँ रहेको छ ।

प्रकाशित मिति : १७ कार्तिक २०८०, शुक्रबार ००:००  १२ : १६ बजे